ஐ.நாவை நோக்கிய கையெழுத்து இயக்கத்தினை வலுவூட்டுவோம் : செந்தமிழன் சீமான் பத்திரிகையாளர் சந்திப்பில் அறைகூவல்!

உலகப்பரப்பெங்கும் தமிழர்களால் வீச்சுடன் முன்னெடுக்கப்பட்டு வரும் பத்து இலட்சம் கையெழுத்து இயக்கத்துக்கு வலுவூட்டி நாம் தமிழர் கட்சி செந்தமிழன் சீமான் தலைமையில் சமூக அரசியல் பிரமுகர்களது பத்திரிகையாளர் சந்திப்பொன்று சென்னையில் இடம்பெற்றுள்ளது.

எதிர்வரும் செப்ரெம்பர் மாதம்

சிறிலங்கா தொடர்பிலான ஐ.நா.மனித உரிமைகள் உயர் ஆணையாளரின் விசாரணை அறிக்கையின் பரிந்துரையில் காத்திரமாக தாக்கத்தை ஏற்படுத்தும் முகமாக சிறிலங்காவை சர்வதேச குற்றவியல் நீதிமன்றத்தின் முன் நிறுத்துமாறு இக்கையெழுத்து இயக்கம் ஐ.நாவைக் கோருகின்றது.

https://youtu.be/Ink7wzxC_P4

நாடுகடந்த தமிழீழ அரசாங்கத்தின் ஒருங்கிணைப்பில் தமிழீழம், புலம், தமிழகம் என தமிழர்கள் பரந்து வாழ்கின்ற தேசங்களெங்கும் முன்னெடுக்கப்பட்டு வரும் இக்கையெழுத்து இயக்கம் ஐந்து இலட்சத்தினை எட்டியுள்ளது.

இந்நிலையில் தமிழகத்திலும் இச்செயற்பாட்டினை இன்னும் வீரியப்படுத்தும் நோக்கில் நாம் தமிழர் கட்சியின் தலைமை ஒருங்கிணைப்பாளர் சீமான் அவர்களது தலைமையில் பத்திரிகையாளர் சந்திப்பு இடம்பெற்றுள்ளது.

சென்னை பத்திரிக்கையாளர் மன்றத்தில் (03-07-2015) மாலை 3 மணிக்கு நடைபெற்ற இச்சந்திப்பில் செந்தமிழன் சீமான் (தலைமை ஒருங்கிணைப்பாளர் நாம் தமிழர் கட்சி), K.K.S.M. தெகலான் பாக்கவி ( SDPI மாநில தலைவர்), S.S. ஹாரூன் ரசீத் (இணைப் பொதுச்செயலாளர் மனிதநேய மக்கள் கட்சி), கே.எம்.சரீப் (தலைவர் தமிழக மக்கள் ஜனநாயக கட்சி), சே.ஜெ.உமர்கயான் (இன அழிப்புக்கு எதிரான இசுலாமிய இளைஞர் இயக்கம்) ஆகிய பிரதிநிதிகள் பங்கெடுத்திருந்தனர்.